Përfaqësuesi i lartë i Bashkimit Evropian për politikë të jashtme dhe siguri, Josep Borrell, pritet që javën e ardhshme të dorëzojë raportin për hapat që ka bërë Kosova në përmbushjen e detyrimeve për heqjen e masave të BE-së ndaj saj. Një raport i tillë nga shefi i diplomacisë së BE-së ishte kërkuar nga vendet anëtare në mënyrë që të vlerësohet nëse janë realizuar kushtet që Kosovës t’i hiqen masat. Burime nga brukseli thanë për radion Evropa e Lirë se nuk e dinë se çfarë saktësisht do të përmbajë raporti dhe nëse Borrell do të rekomandojë heqjen e masave. Qeveria e Kosovës ka insistuar disa herë se ajo i ka përmbushur kërkesat, dhe se situata në veri të Kosovës është shtensionuar, serbët e Kosovës kanë pasur mundësi të votojnë për shkarkimin e kryetarëve të komunave dhe tani, sipas tyre, nuk ka më arsye që këto masa të mbeten në fuqi.