Japonia ka lëshuar një paralajmërim për megatërmet pasi një tërmet me magnitudë 7.5 goditi bregun lindor të Aomorit, prefekturën më veriore të ishullit kryesor të Japonisë, Honshu. Dëmi nga tërmeti ishte modest, 34 lëndime kryesisht të lehta dhe disa dëmtime në rrugë dhe ndërtesa. Zyrtarët thanë se paralajmërimi i lëshuar të martën nuk ishte një parashikim dhe probabiliteti i një tërmeti me magnitudë 8 ose më të madhe, ishte vetëm rreth 1%. Por ata shpresojnë që paralajmërimi do të bëjë të mundur që publiku të jetë i përgatitur në rast të një tërmeti të fuqishëm që mund të ketë pasojat shkatërrimtare të katastrofës së vitit 2011 që vrau gati 20,000 njerëz. Zyrtarët thanë se kishte një rrezik në rritje për një tërmet me magnitudë 8 ose më të madhe, brenda javës së ardhshme dhe i nxitën banorët, veçanërisht përgjatë zonave bregdetare, të jenë të përgatitur. Gjysma jugore e vijës bregdetare të Japonisë në Paqësor mori një njoftim për megatërmet në verën e vitit 2024, por paqartësia e këtij paralajmërimi çoi në blerje paniku të ushqimeve, anulime të eventeve dhe mbyllje biznesesh. Agjencia Meteorologjike e Japonisë tha se tërmeti i fuqishëm i së hënës rriti përkohësisht rreziqet e mundshme në rajonet e Hokkaido dhe bregdetit Sanriku. Duke shpjeguar njoftimin, zyrtarët japonezë thanë se tërmeti me magnitudë 9.0 në vitin 2011 ndodhi dy ditë pas një tërmeti me magnitudë 7.3. Tërmeti i 2011-ës shkaktoi një cunami që goditi qytetet bregdetare veriore në prefekturat Iëate, Miyagi dhe Fukushima. Cunami, i cili arriti në 15 metra në disa zona, dëmtoi termocentralin bërthamor të Fukushimës. Një tjetër megatërmet në det të hapur në zonën Hokkaido-Sanriku mund të shkaktojë një cunami dallga e të cilit mund të arrijë deri në 30 metra lartësi, të vrasë deri në 199,000 njerëz, të shkatërrojë deri në 220,000 shtëpi dhe ndërtesa dhe të shkaktojë dëme ekonomike të vlerësuara deri në 31 trilionë jen ose 198 miliardë dollarë, sipas një vlerësimi qeveritar.