Dy banesa janë djegur, familje janë evakuuar dhe dëme të mëdha në të mbjella është bilanci i deritanishëm i zjarrit masiv që përfshiu zonën e Priskës në Tiranë. Flakët që shpërthyen paraditen e së mërkurës në Gurras, të favorizuara nga era, temperaturat e larta dhe terreni i vështirë për ndërhyrje u përhapën me shpejtësi fillimisht në drejtim të Daiasit, Priskës së Madhe dhe më pas drejt Lundrës dhe zonës së Farkës. Gjatë natës vatrat u qetësuan disi, edhe falë ndërhyrjes së zjarrfikësve, por paraditen e së enjtes rifillimi i erës aktivizoi disa prej tyre duke e bërë situatën sërish kritike. Në terren janë dhjetëra forca zjarrfikëse të Tiranës, Kamzës dhe Elbasanit, teksa është ndërhyrë edhe nga ajri. Prej flakëve është ndërprerë energjia elektrike, çka ka bërë që të fiken pompat e ujësjellësit, duke ndërprerë furnizimin në disa fshatra përreth, përfshirë edhe në zonën e Lundrës. Autoritetet thonë se deri më tani zjarri ka djegur mbi 20 hektarë tokë, kryesisht bimësi të egër, pyje dhe shkurre, por edhe ullishte dhe vreshtari.