Grupi i mercenarëve rusë Vagner, i përdorur nga moska deri pak javë më parë në fushën e betejës në Ukrainë, deri në rebelimin kundër Kremlinit, ka publikuar në telegram një seri fotosh që tregojnë themeluesin Jevgeni Prigozhin, të maskuar, në disa prej misioneve të tij jashtë vendit. Publikimi i fotove erdhi pasi gjatë një kontrolli të forcave ruse të rendit, në zyrën dhe shtëpinë e i’ish-kuzhinierit’ të Putinit, u zbuluan paruke, mjekrra të rreme, syze dhe veshje të tjera ushtarake. Bashkë me këto u zbuluan edhe armë, municione, pasaporta, para e madje edhe lingota ari. Por, ajo që tërhoqi më shumë vëmendjen ishin pikërisht paruket...Ndaj, për të shuar kuriozitetin, grupi Vagner vendosi të publikonte shpjegimin. “Përse një person që të gjithë e njohin ka nevojë për kaq shumë paruke?”, shkruante grupi në telegram...Përgjigjia është shumë e thjeshtë: për udhëtimet jashtë vendit. Dhe më pas, publikohen disa prej fotove të Prigozhin i maskuar, si një funksionar i ministrisë së mbrojtjes në sudan, si asistent diplomatik në Abu Dhabi, si ushtarak në pension në Bengazi, si kolonel në Tripoli, tregtar në siri apo komandant diku tjetër. Dhe më pas, edhe një tjetër postim që duket si një provokim për moskën...”Provoni të imagjinoni se si është maskuar sot?”