Fredi Beleri pretendon se po i bëhet një padrejtësi e madhe nga gjykatat shqiptare. Kryetari i zgjedhur i Bashkisë së Himarës akuzon gjykatën e posaçme për qëndrim të dyfishtë. Përmes një reagimi në rrjetet sociale, Beleri thotë se nga njëra anë GJKKO i thotë që t’i drejtohet drejtorisë së burgjeve për kërkesën për t’u liruar përkohësisht sa të betohet, nga ana tjetër e njëjta gjykatë nuk shqyrton padinë e ngritur ndaj tij kundër drejtorisë së burgjeve për moskthim përgjigje. Ajo që sqaron kryebashkiaku i zgjedhur i Himarës është fakti që në këtë rast kemi të bëjmë me dy procese të ndryshme gjyqësore. I pari, është procesi që ka nisur prokuroria dhe gjykata e posaçme ndaj tij për akuzën e korrupsionit zgjedhor. Kjo akuzë, sipas kodit penal është kompetencë e SPAK dhe gjykatave të posaçme.