Ky paralajmërim i kreut të qeverisë zuri vend menjëherë një ditë pasi ai foli në Shëngjin. 4 punonjës të Inspektoriatit Vendor të Mbrojtjes së Territorit në qarkun e Dibrës janë vënë nën hetim, pasi kanë lejuar qytetarët që të ndërtojnë pa leje. Për këtë arsye është proceduar Ermal Xhaka 37-vjeç me detyrë kryeinspektor pranë Inspektoriatit Vendor të Mbrojtjes së Territorit, Bashkia Dibër, si dhe tre inspektoret Jetmir Osmani, Fitim Raska e Shpëtim Iskurti. Njoftimi është dhënë nga Policia e Dibrës, ndërsa aksioni vjen pak ditë pas paralajmërimeve të vazhdueshme nga ana e kryeministrit Edi Rama se nuk do të ketë asnjë tolerancë për personat që shkelin ligjin duke ndërtuar pa leje. Në mesin e personave të proceduar është dhe kryeinspektori, ndërsa akuza që rëndon mbi të katërt është ajo e “Shpërdorimi të detyrës”, pasi duke mos kryer detyrat e tyre funksionale për inspektimin dhe mbrojtjen e territorit nga ndërtimet e kundraligjshme, kanë lejuar qytetarë që të kryenin ndërtime pa leje në territorin e Bashkisë Dibër. Procedurialisht, specialistët e Seksionit për Hetimin e Krimit Ekonomik e Financiar, në Drejtorinë vendore të Policisë së Dibrës i dërguan materialet procedurale në Prokurori.