11 emigrantë nga Lindja e Mesme rrezikuan të mbyteshin këtë të premte në Ishullin e Sazanit pasi ishin duke lëvizur me një gomone të vogël dhe me sasi të pamjaftueshme karburanti. Shërbimet e Drejtorisë Vendore për Kufirin dhe Migracionin Vlorë, Roja Bregdetare dhe Guardia di Finanza u erdhën në ndihmë. Kërkesa për ndihmë në Vlorë erdhi rreth orës 07:30 të mëngjesit përmes një telefonate nga një numër grek, ku u tha se disa emigrantë rrezikonin të mbyteshin në det, në veri të ishullit të Sazanit. Menjëherë pas telefonatës shërbimet policore u nisën drejt zonës së sinjalizuar. Si rezultat i reagimit dhe koordinimit të shërbimeve të Policisë Kufitare, Rojes Bregdetare dhe Guardia di Finanza, u bë i mundur lokalizimi i gomones në hapësirën detare dhe nxjerrja në breg, në gjendje të mirë shëndetësore, e 11 emigrantëve. Nga veprimet e deritanishme hetimore rezulton se mjeti lundrues ishte një gomone me përmasa të vogla rreth 3 metra, me sasi të pamjaftueshme karburanti në serbator. Gjithashtu, nga monitorimi i hapësirës detare me radarë rezulton se gjatë 48 orëve të fundit nuk ka pasur asnjë tentativë të mjeteve lundruese për të lëvizur drejt ujërave ndërkombëtare. Grupi i posaçëm hetimor, i ngritur për këtë rast, vijon punën nën drejtimin e Prokurorisë, për sqarimin e plotë të rrethanave dhe dokumentimin me prova ligjore të këtij rasti.