Presidentja e Gjeorgjisë, Salome Zurabishvili i ka bërë thirrje partisë në pushtet, Ëndrra Gjeorgjiane, e afërt me Moskën, që të caktojë një datë për zgjedhjet e reja parlamentare deri më 29 dhjetor, mes trazirave mbi votimin e fundit dhe vendimit të njëanshëm të partisë për të shtyrë negociatat me Bashkimin Evropian. Zurabishvili është bllokuar në një përplasje me partinë që kur ajo fitoi zgjedhjet parlamentare të tetorit, ku dominuan akuzat për mashtrime zgjedhore. Opozita ka refuzuar të njohë votimin, duke akuzuar Ëndrrën Gjeorgjiane për manipulim të votave për të marrë pushtetin. Në një fjalim mbrëmjen e kaluar, presidentja ftoi miliarderin e afërt me Rusinë, Bidzina Ivanishvili, një ish-kryeministër dhe themelues i Ëndrrës Gjeorgjiane, në pallatin presidencial për bisedime mbi caktimin e datës së zgjedhjeve. Ëndrra Gjeorgjiane ka refuzuar të marrë në konsideratë mundësinë e zgjedhjeve të reja pavarësisht protestave pothuajse të përditshme që pasuan fitoren e saj dhe vendimit pasues për të ndërprerë bisedimet me BE-në deri në vitin 2028. "Ivanishvili duhet të vijë në presidencë dhe unë jam gati të ulem dhe të diskutoj me të për caktimin e zgjedhjeve. Për datën e zgjedhjeve duhet të bihet dakord deri më 29 dhjetor," tha Zurabishvili në një tubim në Tbilisi, vendi i protestave të panumërta të gjeorgjianëve.