Presidenti i Çadit, po udhëheq "personalisht" një kundërofensivë të ushtrisë kundër Boko Haram pas një sulmi vdekjeprurës nga grupi xhihadist në një garnizon ushtarak, tha presidenca të enjten. Xhihadistët vranë rreth 40 njerëz gjatë një bastisjeje të së dielës në bazën në rajonin e Liqenit Çad. “Presidenti i republikës, komandanti suprem i forcave të armatosura, Mahamat Idriss Deby Itno, është ende i vendosur në buzë të liqenit Çad, ku ai personalisht drejton operacionin ‘Haskanite’”, tha presidenca në Facebook. Deby po mban "takime, udhëzime dhe drejtime të shumta në mënyrë që të mos u lërë asnjë shans anëtarëve të Boko Haram", shtoi njoftimi. Forcat tokësore dhe ajrore, të cilat janë mobilizuar për operacionin, "kanë hyrë në aksion", thuhet në një postim tjetër në Facebook. Një oficer i lartë i shtabit të përgjithshëm, duke folur në kushte anonimiteti, i tha AFP se një bazë ishte pikasur nga ajri. Xhihadistët vranë rreth 40 njerëz dhe plagosën 37 të tjerë, njoftoi të mërkurën kryeministri i vendit. Operacioni i qeverisë "synon jo vetëm të sigurojë stabilitetin në popullatë", por gjithashtu "të çrrënjos dhe zhdukë grupin e xhihadit", tha kryeministri. Çadi i ka bërë thirrje gjithashtu komunitetit ndërkombëtar që të rrisë mbështetjen e tij për përpjekjet kundër terrorizmit në rajon.