Bekim Sejdiu do të jetë kandidati i Lëvizjes Vetëvendosje dhe Lidhjes Demokratike të Kosovës për postin e presidentit të Kosovës. Karriera e tij prej më shumë se dy dekadash shtrihet në fushën e diplomacisë, marrëhdënieve ndërkombëtare dhe me përvojë në drejtësi kushtetuese. Sejdiu është pedagog, jurist dhe diplomat, ndërsa ka shërbyer edhe si gjyqtar i Gjykatës Kushtetuese të Kosovës që nga viti 2015, I emëruar nga presidentja e atëhershme e Kosovës, Atifete Jahjaga, deri në vitin 2021, kur dha dorëheqje. Gjatë mandatit në Gjykatën Kushtetuese, Sejdiu ka qenë gjyqtar raportues në disa raste me rëndësi politike, përfshirë edhe vendimin e vitit 2020 që çoi në rrëzimin e Qeverisë së Avdullah Hotit. Para emërimit në Gjykatën Kushtetuese, Sejdiu ka shërbyer si ambasador i Kosovës në Turqi dhe më pas si konsull i përgjithshëm në Nju Jork. Ai ka përfunduar studimet në fushën e drejtësisë dhe ka ndjekur studime pasuniversitare në marrëdhënie ndërkombëtare dhe të drejta të njeriut.