Liderit kinez Xi Jinping iu dha një mandat i tretë pesëvjeçar si president i Kinës të premten. Miratimi i emërimit të Xi Jinping në ceremoninë e Kongresit Kombëtar Popullor ishte diçka e pritur, pasi lideri ka mënjanuar rivalët e mundshëm politikë dhe ka mbushur radhët e larta të Partisë Komuniste që udhëheq vendin me mbështetësit e tij, që prej marrjes së pushtetit në vitin 2012. Vota për Xi Jinping në Kongres ishte unanime, 2,952 pro dhe asnjë kundër. Anëtarët e këtij Kongresi zgjidhen nga partia në pushtet. Xi Jinping, 69 vjeç, i dha vetes një mandat të tretë pesëvjeçar si sekretar i përgjithshëm i partisë në tetor, duke thyer një traditë sipas së cilës udhëheqësit kinezë e dorëzojnë pushtetin një herë në dekadë. Një kufizim i vendosur për dy mandate për presidencën e Kinës u hoq nga Kushtetuta kineze më herët, duke nxitur sugjerime se Xi Jinping mund të qëndrojë në pushtet për gjithë jetën. Xi gjithashtu u emërua unanimisht komandant i Ushtrisë Çlirimtare Popullore prej 2 milionë anëtarësh, një forcë që në mënyrë eksplicite merr urdhrat e saj nga partia. Mandati i ri i Xi Jinping dhe emërimi i njerëzve të afërt me të në postet kryesore nënvizon monopolin e tij mbi pushtetin politik kinez, duke eliminuar çdo kundërshtar të mundshëm ndaj agjendës së tij tepër nacionaliste për ndërtimin e Kinës si rivali më i lartë politik, ushtarak dhe ekonomik i Shteteve të Bashkuara të Amerikës, dhe sfiduesja më e madhe e rendit botëror demokratik të udhëhequr nga Uashingtoni.