Endrit Shabani është zgjedhur President i Organizatës së Avokatëve të Popullit të Mesdheut, duke marrë kështu një detyrë të re, dy muaj pasi ai u zgjodh avokat I popullit të Shqipërisë me shumicë votash nga Kuvendi. Vendimi për zgjedhjen e tij si president u mor në unanimitet nga bordi i organizatës, mes vendeve të tjera në garë si Franca, Spanja, Greqia dhe Izraeli. Organizata e Avokatëve të Popullit të Mesdheut është një rrjet ndërkontinental i monitorimit të të drejtave të njeriut, e themelur si platformë strategjike për mbrojtjen e të drejtave të njeriut. Ky rrjet i gjërë përfshin vende si Franca, Spanja dhe Greqia, Maroku, Egjipti, Izraeli dhe Jordania, duke krijuar një front të përbashkët për mbikëqyrjen e standardeve të qeverisjes dhe sundimit të ligjit në të gjithë pellgun e Mesdheut. Pasi u zgjodh president, Shabani tha se ai do të koordinojë përpjekjet e rrjetit për të forcuar pavarësinë e institucioneve të Avokatit të Popullit dhe për të siguruar respektimin e të drejtave të qytetarëve përballë pushtetit ekzekutiv në tre kontinente. Sipas tij, kjo pozicionon zyrën e Avokatit të Popullit të Shqipërisë si një aktor kyç në diplomacinë institucionale, duke i dhënë Tiranës një rol drejtues në hartimin e agjendave rajonale për drejtësinë administrative dhe mbrojtjen e të drejtave të njeriut. Ky vlerësim që iu dha Shabanit e në veccanti Shqipërisë, vjen në një moment kritik për rajonin, ku sfidat e llogaridhënies administrative dhe mbrojtja e lirive civile mbeten prioritete globale.