Presidenti i Republikës Çeke, Millosh Zeman, kërkoi falje për bombardimet e NATO-s në ish-Jugosllavi, në vitin 1999. Zeman priti të martën në Pragë presidentin e Serbisë, Aleksandar Vuçiç. “Dua t’i kërkoj falje popullit serb”, tha Zeman. Ndërkohë Vuçiç tha se, nga ky moment, populli serb do t’i konsiderojë çekët “jo vetëm si popull mik, por edhe si popull vëlla”. “Populli serb nuk do t’i harrojë këto fjalë të Zemanit. Do të jemi përjetësisht mirënjohës, sepse këtë që tha ai rreth bombardimeve, nuk e ka thënë askush tjetër”, tha Vuçiç. Zeman ka qenë kryeministër në vitin 1999 dhe Qeveria çeke, si shtet anëtar i NATO-s, e ka mbështetur ndërhyrjen e aleancës ushtarake në ish-Jugosllavi. Rrjedhimisht, Zeman ka dhënë leje për përdorimin e hapësirës ajrore çeke nga avionët ushtarakë të NATO-s, që merrnin pjesë në operacione. Duke reaguar ndaj ndjesës së Zemanit, kryetarja e partisë opozitare TOP09, Marketa Pekarova Adamova, shkroi në Tëitter se “Millosh Zeman ka kërkuar falje vetëm për veten e tij”. Fushata ajrore e NATO-s mbi ushtrinë e atëhershme jugosllave ka pasur për qëllim ndaljen e dhunës në Kosovë. Pas fushatës, që zgjati 78 ditë, ushtria serbe u tërhoq nga Kosova. Zeman tha se mbështetja për sulmet e NATO-s ishte rezultat i “mungesës së guximit”.