Presidenti çek Petr Pavel doli nga spitali të premten pasi pësoi lëndime të lehta në një aksident me motor të enjten, tha zyra e tij. "Axhenda e tij për javën e ardhshme mbetet e pandryshuar, duke përfshirë edhe një udhëtim të planifikuar jashtë vendit," tha zyra e presidentit. Pavel është planifikuar të vizitojë Jordaninë javën e ardhshme dhe gjithashtu do t’i bashkohet ministrave të jashtëm të NATO-s që do të takohen në Pragë. “Lëndimi u shkaktua nga një rënie nga një motoçikletë me shpejtësi të ulët, gjatë praktikës në terren në një pistë të mbyllur”, thanë zëdhënësit pa specifikuar shkallën e lëndimit. Pavel, një ish-shefi i ushtrisë çeke dhe kreu i komitetit ushtarak të NATO-s, 62-vjeçar, u zgjodh president vitin e kaluar dhe e ka ruajtur hobin e tij të motoçiklizmit, që atëherë. Gazeta lokale Denik N tha se presidenti u plagos në një qark të mbyllur në rajonin e Bohemisë Qendrore. Në një postim në Tëitter, kryeministri çek Petr Fiala i uroi presidentit "shërim të shpejtë". Në prill, Pavel u plagos në fytyrë në një poligon qitjeje në Uhersky Brod gjatë një vizite në Rajonin Zlin në juglindje të Republikës Ceke. Ai pësoi një lëndim të lehtë pranë vetullave ndërsa qëlloi me armë, por lëndimi nuk kërkonte trajtim mjekësor, njoftoi Agjencia Çeke e Lajmeve.