Presidenti kinez, Xi Jinping, është larguar nga Moska pas një vizite treditore në kryeqytetin rus, ku takoi presidentin e Rusisë, Vladimir Putin. Në këtë vizitë, të mbushur me simbolikë, dy liderët kanë shpalosur synimet e tyre për rendin e ri botëror. Por, çfarë realisht rezultoi nga takimi? Mbrëmjen e 21 marsit, Xi dhe Putin nënshkruan një deklaratë të përbashkët, pas bisedimeve që zhvilluan në Kremlin, e në të cilat u trumbetua “roli pozitiv” i Kinës dhe “pozicioni objektiv” i saj për luftën e Rusisë në Ukrainë. Dy liderët prezantuan një mori marrëveshjesh, në të cilat janë detajuar planet për lidhjet ekonomike të së ardhmes dhe bashkëpunimi më i ngushtë mes mediave shtetërore të të dyja palëve. Në takim u kritikua edhe Perëndimi, sidomos Shtetet e Bashkuara dhe NATO-ja. Mirëpo munguan marrëveshjet vendimtare për çështje ekonomike dhe ndihmën që do t’i duhej Moskës për ta përballuar presionin e sanksioneve ekonomike. “Synimi i Xi-së në këtë udhëtim ka qenë ruajtja e status quo-së me Rusinë, dhe jo lëvizja, as edhe një metër më afër, apo hapja e rrugës për bashkëpunim të ri”, thotë Yu Jie, hulumtuese për Kinën në Institutin Chathan House, me bazë në Londër.