Anulohet tenderi për shërbimin e hemodializës në Shkodër, Lezhë, Korçë, Vlorë dhe Elbasan, me argumentin se u konstatuan pasaktësi apo mangësi në dokumentet e tenderit. Ky akt vjen pas ndryshimeve në drejtimin e dikasterit të shëndetësië, ku tashmë në krye të kësaj ministrie qëndron Klodiana Spahiu. Tenderi me fond limit afërsisht 50 milionë euro për ofrimin e shërbimit në pesë spitale rajonale për një afat kohor prej 4 vitesh u shpall më 17 gusht të këtij viti me procedurë të hapur mbi kufirin e lartë monetar. E vetmja kompani që mori pjesë në garë ishte ‘Diaverum AB’, e cila edhe u shpall fituese më 10 shtator. Tenderi ka marrë dy flamuj të kuq në Open Procurement Albania për shkak të mungesës së konkurrencës, pasi nuk kishte asnjë kompani tjetër në garë përveç ‘Diaverum AB’ dhe pamundësisë kohore për të përgatitur një ofertë teknike të plotë për kompani të tjera që mund të ishin të interesuara për të marrë pjesë në garë.