Dy partitë më të mëdha në vend po shkojnë drejt zgjedhjeve të brendshme, të cilat pritet të prekin çdo qelizë partiake, por të mos prodhojnë surpriza për lidershipin. Të shtunën e 21 marsit në orën 10:00, Partia Socialiste do të mbledhë asamblenë kombëtare në një hotel privat në Gjirin e Lalëzit. Në mesazhin që u është dërguar socialistëve thuhet: “Pjesëmarrja juaj është e domosdoshme për vijimin e punimeve të Asamblesë.” Ky takim do të përcaktojë një program të detajuar zgjedhor. Në 35 vjetorin e themelimit, Partia Socialiste do të hyjë në një proces zgjedhor në të gjithë strukturën vendore. Këtë vit edhe me një dimension të ri, degët e partisë në diasporë. Nga ana tjetër, edhe demokratët do të vijojnë zgjedhjet për kryetar nëpër degë, të cilat pritet të zgjasin deri më 30 prill. Ndërkohë, zgjedhjet për drejtimin e partisë do të mbahen më 23 maj, ku Sali Berisha pritet të rikandidojë për të vijuar të qëndrojë në krye të selisë blu.