Policia e Krujës ka ushtruar kontroll në hotelin në pronësi të Ardian Gjebeshit, në kuadër të operacionit të koduar ‘Implikimi’, në vijimsi të verifikimeve të shtetasve me precedentë kriminalë. Gjatë kontrolleve në ambientet e hotelit të 40-vjeçarit Gjebeshi, me precedent të mëparshëm penal, Policia ka gjetur një armë zjarri pistoletë, 1 krehër me 20 fishekë luftarakë, 1 jelek antiplumb dhe 20 000 euro të dyshuara të përfituara nga veprimtari të kundërligjshme. Në përfundim të veprimeve procedurale për rastin, uniformat blu të Krujës kanë vënë në pranga pronarin e hotelit, 40 -vjeçarin Ardian Gjebeshi, dhe janë sekuestruar sendet e kundërligjshme që posedonte ai. Policia njofton se hetimi vijon për të dokumentuar plotësisht veprimtarinë kriminale të këtij shtetasi. Sakaq, materialet procedurale iu referuan Prokurorisë, për veprime të mëtejshme.