Ministri i Jashtëm rus Sergei Lavrov tha të hënën se mbështetja e Shteteve të Bashkuara, Britanisë dhe Francës për Ukrainën po nxiste rreziqe serioze strategjike që kanë rritur rrezikun e një konfrontimi të drejtpërdrejtë midis fuqive më të mëdha bërthamore në botë. Lavrov tha se Shtetet e Bashkuara dhe NATO ishin të fiksuar me idenë për t'i shkaktuar "humbje strategjike" Rusisë dhe se kishte rreziqe në një konfrontim të tillë që mund të çonte në një nivel të shtuar të rrezikut bërthamor. "Perëndimorët po shkojnë rrezikshëm në prag të një përplasjeje të drejtpërdrejtë ushtarake midis fuqive bërthamore, e cila mbart pasoja katastrofike," tha Lavrov. Shtetet e Bashkuara dhe aleatët e tyre thonë se po ndihmojnë Ukrainën që të mbrohet kundër agresionit rus dhe se është Rusia ajo që po përkeqëson tensionet Lindje-Perëndim, duke përfshirë edhe paralajmërime të përsëritura për rrezikun e një konflikti bërthamor. Lavrov tha: "Shqetësim të veçantë përbën fakti se "trojka" e shteteve bërthamore perëndimore është sponsorja kryesore e regjimit kriminal të Kievit, iniciatorja kryesore e hapave të ndryshëm provokues. Ne shohim rreziqe serioze strategjike në këtë drejtim cka edhe po con në rritjen e nivelit të rrezikut bërthamor”. Tre vendet perëndimore me armë bërthamore janë Shtetet e Bashkuara të amerikës, Britania e madhe dhe Franca.