Policia e Kosovës ka nisur hetimet për posterët që janë vendosur në veri të Kosovës, në komunën e Leposaviçit dhe të Zubin Potokut, natën mes së shtunës dhe së dielës, në të cilat shihet fotografia e Milan Radoiçiqit me mesazhin: Kthehu në Kosovë, vëlla, serbët nuk mund të vuajnë më. Zëvendës drejtori i policisë për rajonin e veriut, Veton Elshani, ka konfirmuar fillimin e hetimit për radion Evropa e Lirë. Milan Radoiçiç, ishte nënkryetar i partisë më të madhe të serbëve të Kosovës, Lista Serbe, por dha dorëheqje pasi mori përgjegjësinë për sulmin e armatosur ndaj policisë në fshatin Banjskë, në veri të Kosovës më 24 shtator të vitit të kaluar, ku u vra një polic. Policia ka bërë të ditur se “persona të panjohur kanë vendosur postera në muret dhe dritaret e objekteve, si dhe shtyllat elektrike”, dhe se rasti është duke u hetuar. Kësaj i ka paraprirë ngjitja e posterave në Leposaviç, me foton e Radoiçiçit me gjak në fytyrë dhe mesazhin “Kush është Radoiçiç? Një patriot i rremë. I dyshuar për vrasje të shumta të serbëve në Kosovë. Pronari i një laboratori droge. Një kriminel që abuzoi me rininë tonë për pasurimin e tij. Terrorist". Në fund të posterave shkruhej "Thuaj JO organizatës terroriste Lista Serbe". Radoiçiç është në listën e zezë të SHBA-së për përfshirje në krimin e organizuar ndërkombëtar dhe Kosova po e kërkon atë për disa akuza, përfshirë vrasjen e politikanit Oliver Ivanoviç.