Hetimet paraprake të policisë kanë zbuluar dinamikën e vrasjes me thikë të 21 vjeçarit portugez në një resort turistik në Ksamil të Sarandës. Sipas të dhënave të grumbulluara përmes kamerave të sigurisë dhe dëshmive të personave të shoqëruar, i riu portugez Luis Miguel Varela Mendes ka qenë i pranishëm në resort bashkë me një grup bashkëkombasish të tij, kur janë konfliktuar me ekipin e sigurisë të resortit. Dyshohet se sherri masiv ka nisur rreth orës 2 pas mesnate në një beach bar, pjesë e resortit dhe në të janë përfshirë mbi 30 persona, mes të cilëve edhe autori i dyshuar i vrasjes, Sokrat Vata, i punësuar si truprojë në resortin në fjalë. Vata ka goditur portugezin disa herë me thikë pas shpine, teksa më pas e ka nxjerrë jashtë rreth orës 2:30 minuta duke e lënë te shezlonget, ku u gjet i pajetë tre orë më vonë. Policia e Sarandës ka shoqëruar të paktën 42 persona për të zbardhur dinamikën e konfliktit dhe për të përcaktuar përgjegjësinë e secilit prej personave që ndodheshin në lokal.