Sokrat Vata, i akuzuar për vrasjen e turistit portugez Luis Miguel Varela Mendes në Ksamil, ka dhënë dëshminë e tij në sallën e gjyqit, duke pretenduar se veproi në kushtet e vetëmbrojtjes. Vata ka deklaruar para trupit gjykues se konflikti nisi në një lokal, ku ndodhej një grup turistësh francezë që po bënin zhurmë. Sipas dëshmisë, shoku i tij u ka kërkuar turistëve të ruanin qetësinë, por situata është përshkallëzuar pas sharjeve dhe më pas ka nisur përleshja fizike. Vata ka pretenduar se gjatë konfliktit, një prej turistëve kishte një thikë, të cilën ai ia ka marrë pasi e ka neutralizuar. Më pas, sipas dëshmisë së tij, një tjetër turist e ka goditur me shkelm në nofull, duke e rrëzuar në tokë. Ai ka deklaruar se, ndërsa turistët po tentonin ta godisnin sërish, ka lëvizur dorën instinktivisht për t’u mbrojtur, por nuk kujton momentin kur ka goditur me thikë 20-vjeçarin portugez. “Nuk e kujtoj si e kam goditur. Isha në shok. Nuk e dija nëse ndonjëri prej tyre ishte plagosur, pasi ishin shumë. Nga shoku jam larguar”, ka deklaruar Vata.