Policia gjermane ka zbuluar një operacion të trafikut të drogës në Dyseldorf që përfshinte një piceri që shpërndante fshehurazi kokainë së bashku me porositë. Klientët që kërkonin artikullin 40 në menu, merrnin një dozë kokaine bashkë me picën e tyre, sipas policisë. Zyrtarët e policisë zbuluan se skema u raportua për herë të parë nga inspektorët e ushqimit në mars. Sapo skuadra e anti-drogës filloi survejimin, ajo e kuptoi shpejt pse pica numër 40 ishte kaq popullore. Kur oficerët bastisën shtëpinë e menaxherit të picerisë, 36-vjeçari dyshohet se hodhi një qese me drogë nga dritarja, e cila ra direkt në duart e oficerëve të policisë që ishin poshtë në pritje. Në çanta atij iu gjetën 1.6 kilogramë kokainë, 400 gram kanabis dhe 268 mijë euro para kesh. Pas dy ditësh nën arrest, menaxheri u lirua dhe e rihapi picerinë duke vazhduar me shitjen e paligjshme të "picës numër 40", cka i lejoi hetuesit të gjurmojnë zinxhirin e furnizimit të operacionit. Pas disa javësh hetime, rreth 150 oficerë kryen një bastisje të madhe, duke çmontuar rrjetin e drogës dhe duke arrestuar tre të dyshuar, përfshirë edhe kreun e rrjetit, një 22-vjeçar. Shtëpi dhe biznese të lidhura me 12 të dyshuar të tjerë u bastisën gjithashtu. Gjatë kontrolleve, policia zbuloi edhe dy plantacione kanabisi në Mynchengladbah dhe Solingen, që mbanin gjithsej 360 bimë. Oficerët konfiskuan gjithashtu armë, para dhe orë luksoze. Menaxheri i picerisë u arrestua më vonë ndërsa tentoi të largohej jashtë vendit dhe mbetet në paraburgim.