Rritja e madhe e shpenzimeve të mbrojtjes e Polonisë, po ngre shqetësime buxhetore sepse vendi do të bëjë shpenzime më të larta afatgjata për ushtrinë e tij, edhe pse Varshava pranon se përballet me mungesë të ardhurash në buxhetin e saj këtë vit. Ekonomia më e madhe e Evropës Qendrore është në rrugën e duhur për të udhëhequr NATO-n për sa i përket shpenzimeve të mbrojtjes në krahasim me përmasat e ekonomisë së saj, për vitin e dytë radhazi në 2024, bazuar në vlerësimet e NATO-s. Shpenzimet parashikohen të rriten edhe më tej në 4.7% të Produktit të Brendshëm Bruto, vitin e ardhshëm, pjesë e një përpjekjeje më të gjerë evropiane për të forcuar aftësitë e mbrojtjes pas pushtimit të Ukrainës nga Rusia në vitin 2022. Fatura e mbrojtjes prej 35 miliardë dollarësh e Polonisë këtë vit mund të tejkalojë atë të fqinjëve të saj ish-komunistë të Evropës Qendrore dhe Balltike të bëra bashkë, për të mos përmendur atë të ekonomive shumë më të mëdha si Italia, e cila prej kohësh ka nënvlerësuar një objektiv të NATO-s për shpenzime të mbrojtjes prej të paktën 2% të produktit të brendshëm bruto. Qeveria e kryeministrit Donald Tusk thotë se kontratat e mbrojtjes të nënshkruara përpara se të merrte pushtetin në fund të vitit 2023 mund të kenë kontribuar në krijimin e një vrime fiskale me vlerë rreth 12.5% të PBB-së së parashikuar të Polonisë për vitin 2025 për shkak të detyrimeve afatgjata të nënvlerësuara. Zëvendësministri i Mbrojtjes Paëel Bejda i tha parlamentit në fillim të këtij muaji se qeveria aktuale "ose do t'i gjejë këto fonde ose do të duhet të braktisë disa objektiva", duke shtuar se aktualisht nuk ka ndërmend të anulojë planet e shpenzimeve.