Polonia dhe Franca nënshkruan një traktat të premten në të cilin zotohen të ndihmojnë njëra-tjetrën në rast të një kërcënimi ushtarak, tha kryeministri polak Donald Tusk. Traktati nënshkruhet mes shqetësimeve për sigurinë në Evropë pas pushtimit të Ukrainës nga Rusia, e cila kufizohet me Poloninë, dhe mes dyshimeve evropiane rreth angazhimit afatgjatë të Presidentit amerikan Donald Trump për sigurinë e kontinentit. Traktati, të cilin të dy vendet e nënshkruan në qytetin francez Nancy, mbulon tema që përfshijnë çështjet e mbrojtjes, energjisë, energjisë bërthamore dhe transportit. "Dispozita që kemi në traktat është... që në rast të një kërcënimi sulmesh ndaj Polonisë dhe Francës, të dy vendet zotohen të ofrojnë ndihmë, përfshirë ndihmën ushtarake", u tha Tusk gazetarëve para se të nisej për në Francë. "Nga përvoja ime, dispozitat e traktatit janë inovative nga pikëpamja e sigurisë sonë", shtoi ai. Tusk tha se traktati i ri hap mundësi për bashkëpunim në një zgjerim të mundshëm të ombrellës bërthamore franceze në mënyrë që ajo të mbulojë edhe Poloninë. Tusk tha se marrëveshja polako-franceze nuk ishte një "alternativë" për marrëdhëniet e Polonisë me Shtetet e Bashkuara. "Ne kemi nevojë si për Amerikën ashtu edhe për një Bashkim Evropian të fortë, edhe në aspektin ushtarak", tha ai. Tusk tha gjithashtu se të dy vendet do të ndërmarrin nisma të përbashkëta që synojnë sjelljen e paqes në Ukrainë, por nuk dha detaje.