Në Poloni ka nisur procedura për ndalimin e hyrjes dhe tranzitit nëpër këtë shtet për udhëheqësin e entitetit të Republikës Serbe të Bosnjës, Millorad Dodik. Procedura është iniciuar për shkak të "shkeljes serioze të integritetit të Bosnjës dhe Hercegovinës, që njihet si subjekt i së drejtës ndërkombëtare", thuhet në njoftimin e Ambasadës. Ambasada sqaroi se nisma është ndërmarrë nga ministri i Jashtëm i Polonisë, Radosłaë Sikorski, dhe se një arsyetim i detajuar për vendimin do të publikohet pas përfundimit të procedurës dhe hyrjes në fuqi të ndalimit. Pushteti në Republikën Sërpska, i udhëhequr nga Dodik, ka nisur miratimin e një sërë vendimesh dhe ligjesh antikushtetuese, për çka Prokuroria e Bosnjës dhe Hercegovinës ka hapur hetime ndaj udhëheqjes së këtij entiteti dhe ka lëshuar urdhërarreste ndaj tyre. Dodik, së bashku me Nenad Stevandiç dhe Radovan Vishkoviç, kryetari i Kuvendit dhe kryeministri i Republikës Sërpska, janë të dyshuar për sulm ndaj rendit kushtetues. Në mars është lëshuar një urdhërarrest ndaj tyre, pasi nuk iu përgjigjën thirrjes për t’u paraqitur në Prokurorinë e Bosnjës dhe Hercegovinës për t’u marrë në pyetje. Më 26 shkurt, Gjykata e dënoi Dodik me një vit burg, si dhe e ndaloi të ushtrojë funksionin e presidentit të Republikës Sërpska për një periudhë gjashtëvjeçare, për shkak të mosrespektimit të vendimeve të përfaqësuesit të lartë ndërkombëtar në Bosnje dhe Hercegovinë. Për shkak të veprimeve që përbëjnë kërcënim për rendin kushtetues të Bosnjës, Gjermania dhe Austria i vendosën Dodik, Stevandiç dhe Radovan Vishkoviç ndalimin e hyrjes në prill. Dodik, së bashku me anëtarët e familjes dhe bashkëpunëtorët politikë kryesorë të tij, tashmë ndodhet në listën e sanksioneve të Shteteve të Bashkuara të Amerikës, ndërsa sanksione ndaj tij ka vendosur edhe Britania e Madhe.