Polonia ka bërë thirrje për një zonë ndalim-fluturimi të mbrojtur nga NATO mbi Ukrainën, cka i lejon asaj të rrëzojë dronët rusë. Ajo thotë se kjo do të ishte mënyra më e mirë për të mbrojtur aleancën ushtarake nga ndërhyrjet në hapësirën ajrore të shteteve të saj anëtare. Kjo vjen pasi 19 dronë rusë shkelën hapësirën ajrore të Polonisë javën e kaluar dhe një tjetër dron rus hyri në hapësirën ajrore rumune gjatë fundjavës. "Mbrojtja për popullsinë tonë nga dronët apo mbetjet e tyre, do të ishte natyrisht më e madhe nëse do të mund të luftonim dronët dhe objektet e tjera fluturuese përtej territorit tonë kombëtar", tha ministri i jashtëm i Polonisë, Radoslaë Sikorski. "Ne si NATO dhe BE mund të jemi të aftë ta bëjmë këtë, por nuk është një vendim që Polonia mund ta marrë vetëm; mund të merret vetëm me aleatët e saj", i tha ai gazetës gjermane Frankfurter Allgemeine. Polonia do të jetë në gjendje të rrëzojë dronët rusë mbi territorin ukrainas, tha ai, duke e quajtur këtë një veprim "të favorshëm". "Nëse Ukraina do të na kërkonte t'i rrëzonim ata mbi territorin e saj, kjo do të ishte e dobishme për ne. Nëse më pyet mua personalisht, duhet ta shqyrtojmë këtë mundësi", tha ai. Incidentet e fundit me dronët rusë në Poloni dhe Rumani, kanë ngritur më shumë tensionet mes NATO-s dhe Rusisë. Polonia aktivizoi Nenin 4 të traktatit të NATO-s, duke kërkuar mbledhje urgjente të aleancës, por nuk e cilësoi inkursionin si sulm. Ekspertët ndërkohë vlerësojnë se Rusia po teston vendosmërinë e NATO-s.