Qeveria e Polonisë ka urdhëruar kontrolle më të rrepta në kufirin e vendit me shtetin fqinj, Sllovakinë, për të frenuar fluksin e shtuar të emigrantëve. Kjo masë vlen për minibusët, autobusët, furgonët dhe automjetet e vogla, të cilat dyshohet se transportojnë emigrantë të jashtëligjshëm, tha kryeministri polak, Mateusz Moraëiecki, gjatë një fushate zgjedhore në Krasnik. Duke i shtuar kontrollet kufitare, Varshava synon të kundërshtojë ata që “po na akuzojnë se kemi kufi të pasigurt”, tha politikani konservator nacionalist, duke shtuar se ka qenë shumë mirë e ditur se në të kaluarën emigrantët mbërrinin në Bashkimin Evropian përmes Hungarisë dhe Sllovakisë, e pastaj përmes Polonisë. Sllovakia dhe Polonia ndajnë një vijë kufitare 540 kilometra të gjatë. Të dyja, si vende anëtare të BE-së, janë pjesë e Zonës Shengen për lëvizje të lirë pa viza. Në Zonën Shengen, e cila ka 26 shtete anëtare, njerëzit nuk kontrollohen në pikat kufitare. Megjithatë, në vitet e fundit, disa shtete e kanë shfrytëzuar një përjashtim dhe në disa raste i kanë kthyer kontrollet kufitare. Së fundmi, fqinji i Polonisë, Gjermania, po përballet me trysni për të kthyer përkohësisht kontrollet kufitare në kufirin që ndan me Poloninë dhe Republikën e Çekisë. Ministrja e Brendshme e Gjermanisë, Nancy Faeser, po zhvillon bisedime me këto dy vende për “masa shtesë kufitare”.