Ministri i Jashtëm polak Radosłaë Sikorski lëshoi një paralajmërim për Moskën në një seancë urgjente të Këshillit të Sigurimit të Kombeve të Bashkuara. Ai i tha Rusisë se nuk duhet të "ankohet" nëse avionët ose raketat e saj rrëzohen mbi territorin e NATO-s, mes tensioneve të larta për shkak të inkursioneve të fundit ajrore nga Moska. Duke folur në një takim urgjent të Këshillit të Sigurimit të Kombeve të Bashkuara, Ministri i Jashtëm polak Radosłaë Sikorski tha se kishte "vetëm një kërkesë për qeverinë ruse". "Nëse një raketë ose avion tjetër hyn në hapësirën tonë pa leje, qëllimisht ose gabimisht, dhe rrëzohet dhe mbetjet bien në territorin e NATO-s, ju lutem mos ejani këtu për t'u ankuar", tha Sikorski. "Ju jeni paralajmëruar". Seanca e KS të OKB-së u mblodh pasi Estonia raportoi të premten se tre avionë luftarakë rusë hynë në hapësirën e saj ajrore pa leje dhe qëndruan atje për 12 minuta. Kjo ndodhi pak më shumë se një javë pasi avionët e NATO-s rrëzuan dronë rusë mbi Poloni dhe ngritën frikën se lufta e Moskës në Ukrainë mund të përhapej. Sekretarja e Jashtme britanike e Mbretërisë së Bashkuar, Yvette Cooper, i tha Moskës në takimin e Këshillit të Sigurimit të OKB-së se "veprimet e saj të pamatura rrezikojnë përballje të drejtpërdrejtë të armatosur mes NATO-s dhe Rusisë". "Aleanca jonë është mbrojtëse, por mos kini asnjë iluzion se jemi gati të mbrojmë qiellin e NATO-s dhe territorin e NATO-s", tha ajo. Më herët, kryeministri polak Donald Tusk kishte thënë në një konferencë për shtyp se vendi i tij do të rrëzonte cdo avion që hyn në hapësirën e tij ajrore pa leje.