Polonia do të raportojë në Komisionin Evropian xAI-në e Elon Musk, pasi chatbot-i i saj Grok bëri komente fyese për politikanët polakë, përfshirë kryeministrin Donald Tusk. Çështjet e paragjykimeve politike, gjuhës së urrejtjes dhe saktësisë së chatbot-eve të Inteligjencës artificiale kanë qenë një shqetësim që nga lançimi i ChatGPT të OpenAI në vitin 2022. Grok hoqi të martën ato që i quajti postime "të papërshtatshme" në mediat sociale pas ankesave nga përdoruesit e X dhe Lidhjes Kundër Shpifjes se Grok prodhonte përmbajtje me tone antisemite dhe lëvdata për Adolf Hitlerin. Një gjykatë turke bllokoi më parë aksesin në disa përmbajtje nga Grok pasi autoritetet thanë se chatbot-i gjeneronte përgjigje që fyenin Presidentin Tayyip Erdogan, themeluesin e Turqisë moderne, Mustafa Kemal Ataturk, dhe vlerat fetare të vendit. Ministri i dixhitalizimit i Polonisë, Kristof Gavkovski, tha të mërkurën se qeveria do t'i kërkojë Brukselit të hetojë komentet fyese të chatbot-it për politikanët polakë. "Kam përshtypjen se po hyjmë në një nivel më të lartë të gjuhës së urrejtjes, e cila nxitet nga algoritmet, dhe se mbyllja e syve ose injorimi i kësaj sot... është një gabim që mund t'i kushtojë njerëzimit në të ardhmen", tha ai. Zhvilluesi i chatbot-it, xAI, nuk iu përgjigj kërkesave për koment.