Polonia ka marrë edhe dërgesën e parë me sistemet raketore HIMARS, të prodhimit amerikan. Varshava planifikon që t’i dislokojë këto sisteme në një rajon që gjendet në kufi me Rusinë, tha ministri polak i Mbrojtjes. “Kjo armë do të dislokohet në pjesën verilindore të vendit tonë... detyra e saj është të pengojë agresorin”, tha ministri Mariusz Blaszczak. Në mars, Ministria e Mbrojtjes të Polonisë tha se HIMARS-ët, që janë sistem raketor me rreze të gjatë veprimi dhe mjaft preciz, do të stacionohen në njësi ushtarake në Olsztin, që gjendet rreth 80 kilometra nga kufiri rus, afër enklavës së Kaliningradit. Blaszczak tha se HIMARS-ët do të “forcojnë ushtrinë polake në krahun lindor të Polonisë dhe krahun lindor të NATO-s”. Polonia, shtet në kufi me Ukrainën, të cilën e ka mbështetur, kishte blerë 20 HIMARS nga SHBA-ja më 2019 dhe tani ka pranuar dërgesën e parë me këto sisteme raketore. Por, Varshava tani është duke negociuar me Shtetet e Bashkuara që të blejë më shumë HIMARS. “Kongresi amerikan ka miratuar shitjen e pothuajse 500 sistemeve për Poloninë. Këto sisteme do të blihen nga Polonia shumë shpejt”, tha Blaszczak. “Ne duam të sigurohemi që në bazë të kontratës që po negocionojmë, të përfshijmë edhe bashkëprodhimin e HIMARS-ëve, si të raketahedhësve ashtu edhe të raketave të bëhen në Poloni. Ky është qëllimi që i kemi vënë vetes”, shtoi ai. Në fund të janarit, Polonia njoftoi për rritje të shpenzimeve të mbrojtjes për 4 për qind të prodhimit të brendshëm bruto, me kryeministrin polak që ka deklaruar se shteti ka nevojë të armatoset “më shpejt” përballë kërcënimit që vjen ga pushtimi rus i Ukrainës.