Polonia tha se nuk do ta armatosë më Ukrainën dhe vend të dërgimit të armëve atje do të përqendrohet në mbrojtjen e vet. Kjo përplasje mes dy aleatëve vjen në një moment kyç të kundërofensivës së Kievit ndaj forcave ruse. Pasi u rritën mospajtimet lidhur me eksportet e drithërave nga Ukraina, Polonia thirri ambasadorin ukrainas për të protestuar ndaj deklaratave e presidentit ukrainas, Volodymyr Zelensky, në Kombet e Bashkuara. Lideri ukrainas tha se disa shtete vetëm po pretendojnë se po mbështesin vendin e tij, që po synon të rimarrë territorin e pushtuar nga Rusia. Varshava i konsideroi ofenduese këto deklarata. Polonia ka qenë një prej mbështetësve më të vendosura të Ukrainës pasi Rusia nisi pushtimin në shkurt të vitit 2022. Varshava po ashtu është një prej furnizueseve kryesore me armë për Kievin. Shumica e armatimeve që Shtetet e Bashkuara dhe shtetet e tjera kanë dërguar në Ukrainë kanë kaluar përmes Polonisë, shtet që gjendet në kufi me Ukrainën. Polonia po ashtu ka pritur rreth një milion refugjatë ukrainas të cilët kanë përfituar lloje të ndryshme të ndihmave shtetërore. Tensionet midis Varshavës dhe Kievit u nxitën pasi Polonia vendosi ndalesë ndaj importeve të drithërave ukrainase, duke synuar që të mbrojë fermerët e saj. Kryeministri polak, Mateusz Moraëiecki, u pyet të mërkurën nëse shteti i tij do të vazhdojë të mbështesë Kievit, pavarësisht këtyre mospajtimeve. “Ne nuk do të transferojmë më armë në Ukrainë, sepse ne tani po armatosim Poloninë me armë më moderne”, tha Moraëiecki.