Top News/Politikania greke mbron Kosovën në KiE/Bakojani-Askujt nuk i janë kërkuar kaq shumë reforma

“Asnjë vendi tjetër kandidat nuk i janë kërkuar kaq shumë reforma se Kosovës përpara anëtarësimit në Këshillin e Europës”, kështu është shprehur politikania greke Dora Bakojani, në një shkrim të publikuar në European Western Balkans. Në raportin e hartuar për përpjekjen e Kosovës për anëtarësim në Këshillin e Europës, ajo thekson se “për të ardhur tek opinioni pozitiv, u deshën 300 ditë, misione në Prishtinë, Mitrovicë të Veriut dhe Bruksel, një ekip i specializuar e dhjetëra takime me qeveritarë, ambasadorë, bashkiakë serbë, përfaqësues të Kishës Ortodokse Serbe, organizata joqeveritare e organizata ndërkombëtare”. Ndërsa ka nënvizuar reformat që i janë kërkuar autoriteteve në Prishtinë të plotësohen, me qëllim anëtarësimin e Kosovës në organizatë, politikania greke shprehet se asnjë shteti tjetër nuk i janë kërkuar të kryheshin kaq shumë reforma. Bakojani ka theksuar se raporti i saj pozitiv për anëtarësimin e Kosovës në Këshill të Evropës i është kushtuar “vetëm të drejtave të njeriut dhe nevojës që dy milionë evropianë të jenë nën ombrellën demokratike të KiE-së”.