Një i ri vetëm 25 vjec është ekzekutuar nga Policia një orë pas mesnate pak metra larg shtëpisë së tij. Ai u qëllua nga një efektiv i patrullave të përgjithshme të policisë së Tiranës, pasi sipas kësaj të fundit po bënte sjellje të cuditshme dhe nuk I është bindur urdhrit për të ndaluar. Ngjarja ndodhi në zonën e Laprakës, rreth orës 01:45. Mësohet se Klodjan Rasha kishte një armë zjarri, të cilën ia drejtoi policëve. Pikërisht në këtë moment, një prej tyre iu kundërpërgjigj me armë, duke e plagosur për vdekje. 25 vjeçari, i ekzekutuar në orët e para të mëngjesit të kësaj të marte në rrugën "Dritan Hoxha" në Tiranë, rezulton të jetë një person me precedentë penalë, i dënuar për parë për plagosje të lehtë me dashje dhe pengmarrje. Menjeherë është ngritur Grupi i Posaçëm Hetimor i përbërë nga SHÇBA dhe Policia. Prokurori ndodhet në vendngjarje dhe po ndjek e monitoron të gjitha veprimet që po kryhen nga Sherbimi për Çështjet e Brendshme dhe Ankesat në MB dhe nga Policia për zbardhjen e rrethanave të ngjarjes. Punonjësi i policisë është shoqëruar në ambientet e Drejtorisë Vendore të Policisë Tiranë, për veprime të metejshme. Ndërkohë, nga hetimet u sekuestrua në cilësinë e provës materiale armë e zjarrit pistoletë me një krehër me fishekë, e cila dyshohet të ketë qenë e viktimës.