Pas nëntë muajsh, ish kryebashkiaku Vangjush Dako u largua nga ambjentet e burgut të Durrësit, me vendim të Gjykatës së Posaçme. Rreth orës 19:00 Dako u shoqërua nga një makinë policie drejt banesës së tij, ku do të qëndrojë nën masën e sigurisë “arrest shtëpie” me mbikëqyrje policore. Ish-kryebashkiaku i Durrësit, Vangjush Dako nuk ishte vetë i pranishëm në sallën e gjyqit kur u mor vendimi për ta lënë në masën e sigurisë ‘arrest shtëpie’ me argumentin se kanë përfunduar afatet e paraburgimit për të. Ndërkohë që seanca për Dakon dhe të akuzuarve të tjerë për shpërdorim detyre dhe falsifikim dokumentesh, është shtyrë për në datën 18 mars në orën 13.00. Shkak për shtyrjen është bërë mungesa e akt-ekspertimit topografik që kishte urdhëruar gjykata, për prokurorinë. GJKKO urdhëroi më 2 shkurt SPAK-un, të plotësojë hetimet lidhur me dosjen për të cilën janë të pandehur ish kryetari i Bashkisë së Durrësit, Vangjush Dako dhe 10 të tjerë, përpara se të vendosë nëse do kalojë për gjykim dosjen. Duke qenë se prokuroria kaloi 25 ditët e afatit dhe nuk paraqiti akt ekspertimin, seanca u vendos të shtyhej.