Policia ka vënë në pranga dy shtetas që shkëmbyen zjarr dhe që u përpoqën të përplasnin me automjet, efektivët e Drejtorisë së Forcës së Posaçme Operacionale duke iu rrezikuar jetën. Në vijim të operacioneve me qëllim kapjen e shtetasve në kërkim, Policia ka pikasur 23-vjeçarin Leonard Dema, i dënuar me 7 vjet burgim nga Gjykata e Trentos, për tentativë vrasjeje. Gjatë operacionit për kapjen e të kërkuarit, në momentin e ndërhyrjes, në një karburant në aksin rrugor “Mamurras–Laç”, 23-vjeçari, që shoqërohej nga shtetasi me iniciale A. F. i armatosur me armë zjarri dhe lëvizte me automjet, sapo ka konstatuar efektivët, ka tentuar t’i përplasë me automjet, duke u rrezikuar jetën. Sipas njoftimit zyrtar, pasagjeri iu ka drejtuar armën e zjarrit pistoletë efektivëve. në kushtet e vetëmbrojtjes, shërbimet e Policisë, gjatë ndërhyrjes për neutralizimin e tyre, kanë plagosur të kërkuarin Leonard Demën, i cili është transportuar në Spitalin e Traumës. Në vijim të veprimeve procedurale, Policia ka arrestuar 28- vjeçarin që shoqëronte Leonard Demën, ndërsa ka sekuestruar armën e zjarrit pistoletë. Hetimet për ngjarjen vijojnë në bashkëpunim me AMP-në, dhe në drejtimin e Prokurorisë.