Policia e Kosovës ka përgënjeshtruar njoftimet e përhapura në disa media serbe, për të shtëna dhe pengesa të vendosura nga shtetas shqiptarë të maskuar në zonën Madljika. Sipas Policisë, pas verifikimeve dhe marrjes së masave policore, nuk ka asnjë të dhënë zyrtare që të konfirmojë ndonjë incident të tillë në brezin kufitar të kësaj zone. Policia thekson se këto ngjarje të raportuara janë të ngjashme me një rast të datës 05 shkurt 2026 në fshatin Parada të Kurshumlisë në Serbi, ku pretendoheshin të shtëna ndaj policisë serbe, duke ngritur dyshime për prodhim të qëllimshëm të dezinformatave. Zonat e përmendura janë fshati Reqicë në Kosovë dhe afër kufirit me Serbinë. Në lidhje me raportimet për të shtëna armësh, Policia bën me dije se është informuar edhe KFOR-i dhe se patrullimet e përbashkëta me këtë trupë vazhdojnë në mënyrë të rregullt.