Pak orë pas vendimit të Gjykatës së Posaçme të Apelit, kundër Krimit të Organizuar dhe Korrupsionit që la në fuqi dënimin e Gjykatës së Shkallës së Parë për ish Prokurorin e Përgjithshëm, Adriatik Llalla, policia ka shkuar të mërkurën në mbrëmje në banesën ë tij për të ekzekutuar urdhrin esapk për arrestimin e tij. Ai nuk është gjendur në shtëpi dhe policia pasi priti rreth 20 minuta u larguar pa mundur të kontaktojë me asnjë. Nuk dihet ende vendndodhja e Llallës, ndërsa tashmë ai është shpallur në kërkim ndërkombëtar. Kujtojmë se, më 9 shator ai është nisur drejt Italisë për t’u kuruar, ndërsa nuk dihet destinacioni i tij final. Sokol Hazizaj, avokat i Llallës, deklaroi gjatë misionit ‘Open’ se ka kohë që nuk ka komunikuar me klientin e tij. Avokati shton se Gjykata është njoftuar para një muaj për gjendjen shëndetësore të Llallës, që sipas avokatit është një gjendje e rëndë duke mos e cilësuar llojin e sëmundjes. Ish Prokurori i Përgjithshëm është dënuar me 2 vjet burgim dhe 5 vjet përjashtim nga funksionet publike, pasi u shpall fajtor nën akuzat për “fshehje dhe mosdeklarim të pasurisë”. Sipas vendimit të lënë në fuqi nga GJKOK do të konfiskohen edhe disa prona të vëna më parë nën sekuestro, përkatësisht 4 sipërfaqe toke, gjithsej 22 mijë metra katrore dhe 1 apartament në Durrës. Ish kryeprokurori Llalla nuk ishte i pranishëm në seancën e sotme, ndërsa avokati i tij Sokol Hazizaj tha se ish aiu gjendet në regjim spitalor. Avokati e quajti vendimin të padrejtë dhe tha se do të ankimohej në Gjykatën e Lartë. Pas këtij vendimi ish Prokurori i Përgjithshëm, Adriatik Llalla, bëhet i pari zyrtar i lartë që dënohet për korrupsion nga Gjykata e Posaçme e Apelit, kundër Krimit të Organizuar dhe Korrupsionit. Gjithashtu Llalla është i pari ish zyrtar i lartë nga Shqipëria, ndaj të cilit Departamenti Amerikan i Shtetit mori në vitin 2018 vendimin për t’i ndaluar hyrjen në Shtetet e Bashkuara, së bashku me familjen, për shkak të përfshirjes në korrupsion. Pas këtij vendimi, të tjerë persona u përfshinë në listën e zezë të shba, ku përmendim ish deputetin Tom Doshi, ish kryetari i Bashkisë së Durrësit Vangjush Dako dhe së fundi ish kryeministri Sali Berisha.