Lideri i shkarkuar i Koresë së Jugut, Yoon Suk Yeol, u arrestua të mërkurën për shkak të përpjekjes së tij të dështuar për të shpallur gjendje lufte, duke i dhënë fund një përballjeje disa javore me autoritetet dhe duke u bërë presidenti i parë në historinë e vendit që arrestohet. Yoon, i cili përballet me akuza për kryengritje pas përpjekjes së tij jetëshkurtër për të shpallur gjendje ushtarake muajin e kaluar, tha se do të bashkëpunonte me hetuesit për të shmangur “gjakderdhjen”. Si një ish-prokuror që udhëhoqi Partinë Konservatore të Fuqisë Popullore drejt fitores në zgjedhjet e vitit 2022, Yoon mund të përballet me dënim me vdekje ose burgim të përjetshëm nëse shpallet fajtor për kryengritje. Ai kishte tentuar ta shmangte arrestimin për javë të tëra duke qëndruar në rezidencën e tij, i mbrojtur nga anëtarët e Shërbimit të Sigurisë Presidenciale që i kishin qëndruar besnikë. Rojet e tij kishin vendosur tela me gjemba dhe barrikada në rezidencë, duke e kthyer objektin në atë që opozita e quajti “kështjellë”. Yoon, i cili kishte premtuar të “luftonte deri në fund”, arriti të shmangte përpjekjen e parë për arrestimin e tij më 3 janar, pas një përballjeje të tensionuar disa orëshe midis rojeve dhe hetuesve anti-korrupsion që punonin me policinë. Por, në orët e hershme të së mërkurës, qindra zyrtarë policorë dhe hetues rrethuan sërish rezidencën, disa duke u ngjitur mbi muret rrethuese dhe duke kaluar nëpër shtigje të fshehta për të arritur te ndërtesa kryesore. Pas një përballjeje rreth pesë orëshe, autoritetet njoftuan se Yoon ishte arrestuar dhe lideri i shkarkuar publikoi një mesazh të regjistruar paraprakisht. “Vendosa të përgjigjem ndaj Zyrës së Hetimeve për Korrupsion”, tha Yoon në mesazh, duke shtuar se nuk e pranonte ligjshmërinë e hetimit, por po bashkëpunonte “për të parandaluar çdo gjakderdhje”. Hetuesit filluan menjëherë ta marrin në pyetje presidentin e shkarkuar por thanë se ai kishte ushtruar “të drejtën e tij për të qëndruar i heshtur”. Ai refuzoi të regjistrohej gjatë marrjes në pyetje, tha një zyrtar, duke shtuar se Yoon do të kalonte natën në një qendër paraburgimi.