Policia Rrugore ka ushtruar kontrolle dhe ka gjobitur disa drejtues mjetesh që lëviznin me fëmijë në makinë pa sistemet e fiksimit. Në videon e publikuar nga policia, vihen re raste të ndryshme, ku fëmijët janë ngjitur në pjesën e sipërme të hapur të makinës, apo janë ulur në vendin e parë të pasagjerit me prindërit, pa sistemi fiksimi. Në njoftimin e saj policia njofton se kushdo që nuk përdor rripat e sigurisë dhe sistemet e fiksimit, të parashikuara për pasagjerët deri në 12 vjeç, ndëshkohet me masë administrative, nga 5000 deri në 15 000 lekë. Më tej bëhet me dije se kur shkelja i takon një fëmije në moshë jomadhore, përgjegjësia bie mbi drejtuesin e mjetit ose mbi atë që është ngarkuar me mbikëqyrjen e fëmijës, kur ai ndodhet aty në momentin e kryerjes së shkeljes. Sakaq në rast se shkelësi është drejtuesi i mjetit, krahas masës administrative, atij i vendoset edhe masa administrative plotësuese pezullim i lejes së drejtimit për një periudhë nga 6 deri në 12 muaj.