Qindra policë kanë kryer kontrolle në një numër pronash nëpër Gjermani, të enjten, nën dyshimet për lidhje me grupin Hezbollah, që mbështetet nga Irani, njoftuan autoritetet ndërsa Berlini po vepron për të frenuar një valë antisemitizmi mes luftës Izrael-Hamas. Kontrollet e kryera në 54 vende, erdhën pasi Gjermania ndaloi aktivitetet e grupit radikal palestinez, Hamas, i shpallur organizatë terroriste nga Shtetet e Bashkuara të Amerikës dhe Bashkimi Evropian, dhe të organizatave të ngjashme, pas sulmit vdekjeprurës të 7 tetorit, të kryer nga luftëtarët e Hamasit në Izrael. “Ne kemi një skenë islamike para syve tanë”, tha ministrja e Brendshme, Nancy Faeser. “Në një kohë kur një numër hebrenjsh ndihen veçanërisht të kërcënuar”, Gjermania “nuk do të tolerojë propagandën islamike apo nxitjen e armiqësisë antisemitike ndaj Izraelit”, shtoi ajo. Gjermania e konsideron Hezbollahun “organizatë terroriste shiite”, ndërsa më 2020 ka ndaluar kryerjen e aktiviteteve në territorin e saj. Operacioni i së enjtes pati në shënjestër Qendrën Islamike të Hamburgut dhe pesë grupe të lidhura me të, ndërsa policia kreu kontrolle në prona në gjashtë prej 16 landeve të Gjermanisë, përfshirë Hamburgun, Saksoninë e Poshtme, Hesen, Berlinin etj. Qendra Islamike e Hamburgut drejton Xhaminë e Imam Aliut, e njohur gjithashtu si Xhamia e Kaltër, ndërsa viteve të fundit janë shtuar thirrjet për mbylljen e saj nga autoritetet, për shkak të lidhjeve të dyshuara me Iranin. E themeluar nga imigrantë iranianë më 1953, Qendra Islamike e Hamburgut është nën vëzhgimin e inteligjencës së brendshme gjermane prej vitesh. Ministria e Brendshme beson se aktivitetet e saj kanë “për synim të përhapin konceptin revolucionar të udhëheqësve supremë të Iranit, diçka që dyshohet se shkel rendin kushtetues të Gjermanisë”.