Policia njoftoi se ka ndërmarrë një operacion masiv në zonën e Krujës kundër kultivimit të hashashit. Sipas njoftimit zyrtar të Policisë së Tiranës, në operacion janë përfshirë me qindra efektivë të Drejtorisë Vendore të kryeqytetit, komisariatit të Krujës dhe Forcës Kombëtare të Sigurisë. Operacioni, thuhet në njoftim, ku u përdoren edhe dronë të cilësisë së lartë, është shtrirë në territorin e fshatrave të njësisë administrative Cudhi dhe do të vazhdojë në ditët në vijim në territorin e fshatrave të njësive të tjera administrative të rrethit Krujë. Gjatë operacionit janë evidentuar dhe asgjësuar me anë të djegies një numër i konsiderueshëm fidanësh dhe bimësh narkotike cannabis. Ndërkohë, grupet e posaçme hetimore po kryejnë veprime hetimore në terren, nën drejtimin e Prokurorisë, me qëllim identifikimin dhe kapjen e autorëve.