Policia e Kosovës ka njoftuar se ka konfiskuar 11 pajisje për prodhim të kriptovalutave në fshatin Uglar të Zubin Potokut. Në njoftimin e Policisë së Kosovës thuhet se qytetarët e lagjes ku kanë qenë të instaluara pajisjet për prodhim të kriptovalutave raportuan rastin në polici pasi sic thuhet, ata kanë pasur probleme të vazhdueshme me energjinë elektrike që si pasojë ka dëmtuar pajisjet e tyre shtëpiake.“Policia e Kosovës bazuar në detyrat dhe autorizimet ligjore kanë ndërmarr veprime të menjëhershëm dhe ka identifikuar shtëpinë e personit të dyshuar dhe në shtëpi janë gjetur njëmbëdhjetë pajisje për prodhimin e kriptovaluatave, Bitcoin”, thuhet në njoftimin e policisë. Policia thotë se nuk ka gjetur në shtëpi personin e kërkuar. Sipas saj, “i dyshuari nuk gjendej në shtëpi pasi herë pas here udhëton nga Beogradi në Zubin Potok”. Që nga viti i kaluar Policia e Kosovës ka zhvilluar dhjetëra aksione për konfiskimin e pajisjeve për prodhimin e kriptovalutave. Në katër komunat veriore, Mitrovicë e Veriut, Zveçan, Zubin Potok dhe Leposaviq janë konfiskuar qindra pajisje dhe në të kaluarën janë identifikuar ‘ferma’ për prodhim të kriptovalutave. Prodhimi i kriptovalutave është i ndaluar në Kosovë që nga shfaqja e krizës energjetike vitin e kaluar. Prodhimi i kriptovalutave në vitet e fundit ka qenë i përqendruar në katër komunat veriore pasi atje, qytetarët nuk e paguajnë energjinë elektrike që nga viti 1999.