Policia në Barcelonë është në kërkim të ish-udhëheqësit separatist të Katalonjës, Carles Puigdemont (Çarls Puxhidemon), i cili bëri një kthim dramatik në Spanjë pas shtatë vitesh qëndrimi në mërgim, pavarësisht se përballet me një urdhër arresti të hershëm. Policia katalanase ka ngritur postblloqe në Barcelonë, në cdo rrug që të nxjerr nga qyteti, si pjesë e operacionit Jaula, ose "kafazi", në përpjekje për të kapur Puigdemon, që u pa të largohej nga një tubim, mëngjesin e të enjtes, me një makinë. Për pjesën më të madhe të viteve të fundit ai ka jetuar në Bruksel, pasi mbi të rëndonin akuza të lidhura me përpjekjen e dështuar për pavarësinë e Katalonjës, në 2017-ën. Në atë kohë, liderët pro-pavarësisë të Katalonjës, përfshirë Puigdemont, organizuan një referendum, që u shpall i paligjshëm nga gjykata kushtetuese e Spanjës. Madridi vendosi sundim të drejtpërdrejtë në rajon pak kohë më pas dhe Puigdemont u largua për në Belgjikë.Të enjten në mëngjes, Puigdemont iu drejtua shkurtimisht qindra mbështetësve që u mblodhën pranë parlamentit katalanas në Barcelonë, pak përpara se një drejtues i ri i qeverisë katalanase të merrte detyrën. Ai tha se ishte kthyer "për t'i kujtuar të gjithëve se ne jemi ende këtu" dhe shtoi: "Mbajtja e një referendumi nuk është dhe nuk do të jetë kurrë krim". Më pas, ai u zhduk. Shumëkush priste që ai të dilte nga ndërtesa e parlamentit në ceremoninë e inaugurimit, por ai nuk u pa askund. Postoblloqe janë ngritur tani në të gjithë qytetin ndërsa disa analistë po shprehin habi se si policia nuk mundi ta arrestonte ish liderin separatist pavarësisht se vetë ai kishte njoftuar se do të kthehej në Katalonjë, në fillim të javës.