Kortezhi me trupin e pajetë të kryepeshkopit Anastas Janullatos është pritur nga dhjetëra qytetarë nga Dropulli, Finiqi, Gjirokastra dhe Saranda në Kakavijë. Homazhet do të zhvillohen pasditen e të martës dhe të mërkurës në katedralen “Ngjallja e Krishtit”. Ceremonia e varrimit do të bëhet po aty, të enjten në orën 11.00, pas Liturgjisë Hyjnore. Policia ka njoftuar se për mbarëvajtjen e homazheve për Kryepeshkopin Anastas Janullatos, janë bllokuar disa akse rrugore nga datat 28-30 janar. Bllokimi nis nga 15:00 e të martës, deri në orën 14:00 të së enjtes. Qarkullimi automjeteve nuk do të lejohet në akset rrugore: -segmenti rrugor “Ibrahim Rugova”, nga Banka e Shqipërisë deri tek degëzimi me Gjykatën e Lartë, - ⁠Rruga e Kavajës, nga kryqëzimi me Rrugën e Bogdanëve deri tek kryqëzimi me rrugën “Ibrahim Rugova”; - Bllokim të pjesshëm do të këtë dhe në rrugën “Ded Gjo Luli”. Gjithashtu, dalja nga rruga “Myslym Shyri” do të devijohet në drejtim të bulevardit “Gjergj Fishta”.