Policia Rrugore e Tiranës ka njoftuar se vetëm gjatë 72 orëve të fundit, janë arrestuar/proceduar 10 shtetas, 2 prej të cilëve tentuan të korruptonin punonjësin e Policisë, për të shmangur ndëshkimin për shkeljet e kryera, 4 për drejtim automjeti në gjendje të dehur, 4 për shkelje të rregullave të qarkullimit rrugor. Blutë njoftojnë se si rezultat i përdorimit të mjeteve logjistike bashkëkohore, janë vendosur 5083 masa administrative për shkelje të ndryshme rrugore. Gjithashtu, janë bllokuar 8 automjete. Gjatë kontrolleve, Policia bën me dije se janë spostuar me mjet ngritës, automjete të konstatuara të parkuara në vendin e rezervuar për autobusë/taksi. Blutë njoftojnë se kontrollet do të vijojnë në të gjitha akset rrugore. Policia Rrugore ka apeluar të gjithë drejtuesit e mjeteve, që të zbatojnë rregullat e qarkullimit rrugor dhe të mos pengojnë lëvizjen e mjeteve të tjera, duke parkuar/ndaluar automjetet, në vende ku nuk lejohet.