Muzika e lartë në lokalet e Tiranës vijon të mbetet një sshqetësim për banorët, që shpesh janë të detyruar ta dëgjojnë deri pas mesnate. E për t’iu përgjigjur këtij shqetësimi, Policia e Tiranës ka intensifikuar kontrollet për identifikimin dhe ndëshkimin e subjekteve që përdorin muzikë të lartë. Kështu në një lokal në rrugën “Mustafa Matohiti”, pas shqetësimit të ngritur nga banorët, Policia ka mbërritur dhe ka ndërhyrë, duke sekuestruar edhe bokset që përdoreshin për të siguruar volumin e lartë të muzikës. Gjithashtu policia ka shoqëruar në rajn edhe dy menaxherët e lokalit, shtetasit E. B., 21 vjeç, dhe M. A., 22 vjeç, të dy banues në kryeqytet, të cilët u proceduan në gjendje të lirë me akuzën për “Prishje të qetësisë publike”. Policia e Shtetit apelon për të gjithë administratorët dhe pronarët e lokaleve dhe hoteleve, që të zbatojnë me rigorozitet ligjin dhe rregullat në lidhje me ndotjen akustike, pasi në rast të konstatimit të ndotjes akustike, shërbimet e Policisë do të sekuestrojnë pajisjet që gjenerojnë muzikë dhe do të procedojnë sipas ligjit, shtetasit përgjegjës.