Trupa policore pritet të formatohet sipas një projektligji për Policinë e Shtetit, i publikuar në konsultimet publike nga Ministria e Brendshme. Sipas projekligjit, policët e moshës 55-vjeçare, pas 30 viteve shërbim, do të përfitojnë trajtim të veçantë për periudhën e mbetur deri në pensionin e plotë të pleqërisë. Sipas draftit, skema do të garantojë një rifreskim të trupës policore dhe kostot do të përballohen nga buxheti i Policisë së Shtetit. Një tjetër aspekt i trajtimit financiar të propozuar është edhe shpërblimi i menjëhershëm në masën e 6 pagave kur punonjësi i policisë përfiton trajtim të veçantë shërbimi ose del në pension pleqërie. Komponentët e këtij trajtimi janë paga për gradë, shtesa për funksion e natyrë të veçantë pune, shtesa për çdo vit vjetërsie shërbimi. Gjithashtu për çdo vit shërbimi mbi 30 vjet masa e trajtimit rritet me 1% të pagës, por nuk duhet të kalojë 80% të saj. “Ofrimi i kredisë me interesa të butë për strehim për punonjësit e policisë, sigurimit shëndetësor të veçantë dhe kompensimit në rastet e plagosjes dhe dëmtimit të shëndetit të punonjësve të policisë janë një tjetër aspekt i rëndësishëm i trajtimit të punonjësit të policisë”, citohet në draft.