Një person që u plagos në të shtënat në një lagje të Kievit të shtunën ka vdekur në spital, duke e çuar numrin e të vrarëve në incident në shtatë, tha të hënën kryetari i bashkisë Vitali Klitschko. Një burrë i lindur në Rusi hapi zjarr mbi kalimtarët me një armëë automatike të shtunën përpara se të mbyllej në një supermarket, ku u qëllua për vdekje nga policia. "Viktima ishte në gjendje jashtëzakonisht të rëndë. Mjekët luftuan për jetën e tij, por për fat të keq nuk mundën ta shpëtonin", tha Klitschko në aplikacionin e mesazheve Telegram. Ai shtoi se shtatë persona, përfshirë një fëmijë, mbeten të shtruar në spital pasi u plagosën në të shtënat, të cilat ndodhën në lagjen e gjelbër Holosiivskyi të kryeqytetit. Katër nga të plagosurit që janë shtruar në spital po mbahen në kujdes intensiv. Incidente të tilla me të shtëna janë jashtëzakonisht të rralla në Ukrainë dhe shërbimi i sigurisë i vendit tha se po hetohej si një akt terrorist. Policia ende nuk ka identifikuar një motiv për të shtënat. Të shtënat kanë ngritur shumë pikëpyetje si në lidhje me të drejtën e publikut për vetëmbrojtje, ashtu edhe në lidhje me mënyrën se si personi i armatosur arriti të merrte një leje për armë zjarri, tha Ministri i Brendshëm Ihor Klymenko.