Përmes deputetit Klevis Balliu, Partia Demokratike ka propozuar në Kuvend ndryshime në ligjin për policinë e shtetit dhe policinë e burgjeve, duke ulur moshën e pensionit. Deputeti demokrat argumenton se ky trajtim i diferencuar nuk përbën privilegj, por është një përgjigje ndaj konsumit të lartë profesional, stresit, gatishmërisë së përhershme dhe punës me turne të zgjatura me të cilat përballen këta punonjës gjatë gjithë karrierës së tyre. Relacioni ndalet sidomos te Policia e Burgjeve, duke cituar edhe raporte të njëpasnjëshme të Avokatit të Popullit që kanë evidentuar problematika serioze në institucionet penitenciare në vend, si mbipopullimi, mungesa e infrastrukturës dhe problemet e sigurisë, kushte këto që rrisin sfidat e përditshme njerëzore dhe profesionale për personelin. Ndryshimet prek rreth 16 mijë punonjës në total, mes policisë së shtetit dhe asaj të burgjeve.